Tadbirda Ombudsman devoni, Bolalar ombudsmani devoni xodimlari, shuningdek, faol nodavlat notijorat tashkilotlari vakillari ishtirok etdi.

Trening xalqaro ekspertlar ishtirokida o‘tkazilib, unda monitoring tashriflarini samarali tashkil etish, ma’lumotlarni tizimli to‘plash va tahlil qilish, ozodlikdan mahrum etilgan shaxslar bilan suhbatlar o‘tkazish hamda monitoring natijalari bo‘yicha dalillarga asoslangan hisobotlar tayyorlash masalalariga alohida e’tibor qaratildi.

Xususan, ishtirokchilar monitoring tashriflari davomida turli axborot manbalaridan foydalanish, olingan ma’lumotlarning ishonchliligini tekshirish, faktlar va xulosalarni o‘zaro farqlash, shuningdek, aniqlangan individual va tizimli muammolarni xolisona baholash bo‘yicha bilim va amaliy ko‘nikmalarini oshirdilar.

Treningning yana bir muhim yo‘nalishi monitoring natijalari bo‘yicha hisobotlar tayyorlashga bag‘ishlandi. Unda hisobotlarda aniqlangan holatlar, dalillar va xulosalar o‘rtasidagi mantiqiy bog‘liqlikni ta’minlash, xalqaro standartlarga tayangan holda amaliy tavsiyalar ishlab chiqish, ularning ijrosi uchun mas’ul davlat organlari va mansabdor shaxslarni belgilash hamda tavsiyalar ijrosi ustidan keyingi nazoratni amalga oshirish masalalari muhokama qilindi.

Trening yakunida ishtirokchilarga sertifikatlar topshirildi.