Taʼkidlash lozimki, O‘zbekiston Respublikasi Konstitutsiyasining 26-moddasida insonning shaʼni va qadr-qimmati daxlsizdir. Hech narsa ularni kamsitish uchun asos bo‘lishi mumkin emasligi qatʼiy belgilangan.

Qolaversa, O‘zbekiston Respublikasi Jinoyat kodeksining 7 moddasiga ko‘ra, jazo va boshqa huquqiy taʼsir choralari jismoniy azob berish yoki inson qadr-qimmatini kamsitish maqsadini ko‘zlamaydi.

Aliment to‘lash — ota-onaning qonuniy majburiyati va bolaning daxlsiz huquqidir. Bolaning taʼminot olish huquqi davlat himoyasida bo‘lib, uni taʼminlash bo‘yicha choralar qonun doirasida qatʼiydir.

Biroq qarzdorlarni ommaviy ravishda obro‘sizlantirish, shaxsiy maʼlumotlarini tarqatish yoki fotosuratlarini jamoat joylariga ilib qo‘yish kabi amaliyotlar huquqiy davlat tamoyillariga mos kelmaydi va inson qadrini kamsitishga olib keladi.

Inson qadri — har qanday ijro harakatlaridan ustundir.

Oliy Majlisning Inson huquqlari bo‘yicha vakili (ombudsman) Axborot xizmati