Oliy Majlisning Inson huquqlari bo‘yicha vakili (ombudsman) o‘z faoliyatida aholining huquqiy xabardorligini oshirishga alohida eʼtibor qaratmoqda. Chunki, Ombudsmanga yuborilayotgan murojaatlar tahlili so‘nggi yillarda aholining ijtimoiy himoyasini mustahkamlash, yashash sharoitlarini yaxshilash borasidagi islohotlardan xabardor etish zarurligini ko‘rsatmoqda. Shuning uchun 2022 yildan eʼtiboran respublikaning chekka hududlarida mahallalar kesimida fuqarolarga yaratilgan imkoniyat va imtiyozlardan aholi xabardorligini oshirishga qaratilgan “Ombudsman maktabi” loyihasi amalga oshirilmoqda.

2023 yilning 8 sentyabr kuni Navoiy viloyati Qiziltepa tumani 13-sonli musiqa va sanʼat maktabida navbatdagi “Ombudsman maktabi” tadbiri o‘tkazildi. Tadbirda “Bo‘ston”, "Alisher Navoiy", " Bunyodkor", “Furqat”, “Yashnobod”, "G‘oyibon", "Zarmitan" MFY aholisi va faollari ishtirok etishdi.

Qayd etish lozimki, Ombudsmanga yuborilayotgan fuqarolar murojaatlari tahlili aholining mamlakatimizda inson huquq va manfaatlarini taʼminlash bo‘yicha amalga oshirilayotgan islohotlar, xususan, ayollar, yoshlar, keksalar, nogironligi bo‘lgan shaxslarga belgilangan huquq va imtiyozlardan bexabar ekanliklarini ko‘rsatdi.

Yuqoridagilardan kelib chiqib, Ombudsman instituti tomonidan murojaatlar hududlar kesimida tahlil qilindi va aholining huquqiy xabardorligini oshirishga zarurat bo‘lgan sohalar tanlab olindi.

“Ombudsman maktabi” loyihasini amalga oshirishdan maqsad –aholini mamlakatimizda inson huquq va erkinliklarini himoya qilish sohasidagi tub o‘zgarishlar to‘g‘risidagi xabardorligini oshirishdan iborat.

Aholining huquqiy xabardorligini oshirishga qaratilgan mazkur tadbir aholini ijtimoiy himoya qilish va mehnat huquqi masalalariga bag‘ishlandi.

“Ombudsman maktabi” loyihasi doirasida Ombudsmanning fuqarolar qabuli ham tashkil etildi

 Oliy Majlisning Inson huquqlari bo‘yicha vakili (ombudsman) Axborot xizmati