Ozarbayjon Respublikasi Milliy Majlisida xalqaro simpozium ishtirokchilari bilan uchrashuv bo‘lib o‘tdi
2025 yilning 18 iyun kuni Qozog‘iston, Qirg‘iz Respublikasi, Mo‘g‘uliston, Misr, Ozarbayjon, O‘zbekiston, Serbiya, Slovak Respublikasi, Turkiya, Ummon va Chernogoriya kabi davlatlarning Ombudsmanlari va inson huquqlari bo‘yicha milliy institutlar rahbarlari Ozarbayjon Respublikasi Milliy Majlisiga tashrif buyurishdi. Ushbu tashrif Baku shahrida tashkil etilgan “Qonun ustuvorligini mustahkamlash: Ombudsmanlar va inson huquqlari bo‘yicha milliy institutlarning o‘rni” mavzusidagi xalqaro simpozium doirasida amalga oshirildi.
Mehmonlarni Ozarbayjon Respublikasi Milliy Majlisi Raisi Sohiba Gafarova qabul qildi. Uchrashuv chog‘ida inson huquqlarini taʼminlashda parlamentlar va inson huquqlari bo‘yicha milliy institutlar o‘rtasidagi hamkorlikni yana-da mustahkamlash, o‘zaro tajriba almashish, global muammolar va sunʼiy intellekt davrida inson huquqlarini himoya qilish kabi masalalar muhokama etildi.
Muloqot davomida ishtirok etayotgan xorijiy davlatlar Ombudsmanlari yuqoridagi masalalar bo‘yicha o‘z fikrlarini bildirishdi.
Uchrashuv do‘stona va konstruktiv ruhda o‘tdi.
Oliy Majlisning Inson huquqlari bo‘yicha vakili (ombudsman) Axborot xizmati
