Озарбайжон Республикаси Миллий Мажлисида халқаро симпозиум иштирокчилари билан учрашув бўлиб ўтди
2025 йилнинг 18 июнь куни Қозоғистон, Қирғиз Республикаси, Мўғулистон, Миср, Озарбайжон, Ўзбекистон, Сербия, Словак Республикаси, Туркия, Уммон ва Черногория каби давлатларнинг Омбудсманлари ва инсон ҳуқуқлари бўйича миллий институтлар раҳбарлари Озарбайжон Республикаси Миллий Мажлисига ташриф буюришди. Ушбу ташриф Баку шаҳрида ташкил этилган “Қонун устуворлигини мустаҳкамлаш: Омбудсманлар ва инсон ҳуқуқлари бўйича миллий институтларнинг ўрни” мавзусидаги халқаро симпозиум доирасида амалга оширилди.
Меҳмонларни Озарбайжон Республикаси Миллий Мажлиси Раиси Соҳиба Гафарова қабул қилди. Учрашув чоғида инсон ҳуқуқларини таъминлашда парламентлар ва инсон ҳуқуқлари бўйича миллий институтлар ўртасидаги ҳамкорликни янада мустаҳкамлаш, ўзаро тажриба алмашиш, глобал муаммолар ва сунъий интеллект даврида инсон ҳуқуқларини ҳимоя қилиш каби масалалар муҳокама этилди.
Мулоқот давомида иштирок этаётган хорижий давлатлар Омбудсманлари юқоридаги масалалар бўйича ўз фикрларини билдиришди.
Учрашув дўстона ва конструктив руҳда ўтди.
Олий Мажлиснинг Инсон ҳуқуқлари бўйича вакили (омбудсман) Ахборот хизмати
