Ochiq muloqot 2025-yil 30-may kuni Qashqadaryo pedagogika texnikumi binosida bo‘lib o‘tdi. Unda Koson tumanining 10 dan ortiq mahallalarida, jumladan “Arabxona”, “Do‘stlik”, “Nartichuqur”, “Yuqori Obron”, “O‘rta Obron”, “Quyi Obron”, “Regzor”, “Beshqo‘ton” MFYlarida yashovchi fuqarolar qamrab olindi.
Tadbirda Koson tumani aholisidan tashqari, murojaatlarda ko‘tarilgan masalalar yuzasidan mas’ul tashkilot va idoralar, shuningdek fuqarolik jamiyati institutlari vakillari ham ishtirok etdi.
Murojaatlar tahlili. 2024-yilda Qashqadaryo viloyatidan Ombudsmanga 3274 ta murojaat kelib tushgan bo‘lib, shundan 818 tasi faqat Koson tumaniga to‘g‘ri keladi. Bu hudud so‘nggi 3 yil ichida murojaatlar soni bo‘yicha yetakchi bo‘lib kelmoqda. Murojaatlar asosan mehnat huquqlari, sud va tergov faoliyatidan norozilik, uy-joy, aliment, kommunal xizmatlar va firibgarlik masalalarini qamrab olgan.
“Koson tumanidan kelayotgan murojaatlar soni ko‘pligini ko‘rib, aynan shu yerning o‘zida odamlar bilan yuzma-yuz gaplashishni lozim topdik. Shuning uchun bugun bu muloqotga murojaatlarda tilga olingan sohalarga daxldor mutaxassislarni ham jalb qildik. Bu faqat bir kundagi gap emas, odamlar o‘z muammolarini kimga yetkazish mumkinligini, qayerga murojaat qilishni aniq bilib olishi kerak. Ana shunda masalalarni hal etish mexanizmi yo‘lga qo‘yiladi. Mahalliy idoralar ham biz bergan tahlildan kelib chiqib, aholi o‘rtasida yuzaga kelayotgan muammolarni tizimli hal etish bo‘yicha chora-tadbirlar belgilab olishadi”, deb ta’kidladi Ombudsman Feruza Eshmatova.
Fuqarolar murojaatlari — ochiq muhokama markazida. Fuqarolar bilan erkin muloqotda huquqiy yordam ko‘rsatish, ijtimoiy xizmatlar sifatini oshirish, o‘zboshimchalik bilan qurilgan uy-joylarga va inshootlarga bo‘lgan huquqlarni e’tirof etish masalalari muhokama qilindi. Mazkur yondashuv xalqaro amaliyotda “community-based legal outreach” — jamoaga asoslangan huquqiy yechim sifatida baholanadi va aholining huquqiy imkoniyatlarini kengaytirishda muhim vosita sanaladi.
Ombudsmanning sayyor qabuli — jonli muloqot, aniq yechimlar.
Tadbir doirasida Ombudsman Feruza Eshmatova tomonidan sayyor qabul tashkil etilib, fuqarolar murojaatlari qabul qilindi hamda ular joyida tegishli tashkilotlar bilan birga ko‘rib chiqildi. Qabulda 40 ga yaqin murojaatlar tinglandi.
Oliy Majlisning Inson huquqlari bo‘yicha vakili (ombudsman) Axborot xizmati
