Shu bilan birga, Oliy Majlisning Inson huquqlari bo‘yicha vakili (ombudsman)ning Navoiy viloyatidagi mintaqaviy vakili tomonidan ushbu muassasalarga monitoring tashriflari amalga oshirildi. Tashriflar davomida mahkumlar uchun yaratilgan shart-sharoitlar – yotoq joylari, ovqatlanish, tibbiy xizmat, uchrashuv xonalari, kutubxona hamda kasbga o‘rgatish to‘garaklari holati o‘rganildi.

Tashrif chog‘ida mahkumlar va ularning yaqinlari bilan sayyor qabul tashkil etildi. Unda kelib tushgan murojaatlarning ayrimlari joyida hal etildi, qolganlariga huquqiy tushuntirish berildi va ijrosi nazoratga olindi. Shuningdek, muassasalarda o‘rnatilgan Ombudsman qutilari ko‘zdan kechirilib, undagi murojaatlar olinib, ijroga qaratildi.

5-son koloniyaga tashrif davomida mahkumlarning qarindoshlari bilan suhbat chog‘ida, uzoq muddatli uchrashuvga kirish uchun bir necha kun navbat kutish hollari mavjudligi bildirildi. Ushbu masala o‘rganilib, uni hal etish bo‘yicha koloniya maʼmuriyati bilan tegishli chora-tadbirlar belgilab olindi.

Monitoring jarayonida mahkumlarning mehnat sharoitlari, ish haqi to‘lanishi, xavfsizlik va sanitariya qoidalariga rioya qilinishi ham ko‘rib chiqildi. Shuningdek, mahkumlar o‘rtasida “Zakovat” intellektual o‘yini tashkil etildi va unda mintaqaviy vakil hayʼat aʼzosi sifatida ishtirok etdi.

Monitoring yakunlariga ko‘ra, Ombudsman taʼsir choralari shaklidagi hujjatlar tayyorlanib, tegishli tashkilotlarga taqdim etildi.

Oliy Majlisning Inson huquqlari bo‘yicha vakili (ombudsman) Axborot xizmati