Шу билан бирга, Олий Мажлиснинг Инсон ҳуқуқлари бўйича вакили (омбудсман)нинг Навоий вилоятидаги минтақавий вакили томонидан ушбу муассасаларга мониторинг ташрифлари амалга оширилди. Ташрифлар давомида маҳкумлар учун яратилган шарт-шароитлар – ётоқ жойлари, овқатланиш, тиббий хизмат, учрашув хоналари, кутубхона ҳамда касбга ўргатиш тўгараклари ҳолати ўрганилди.

Ташриф чоғида маҳкумлар ва уларнинг яқинлари билан сайёр қабул ташкил этилди. Унда келиб тушган мурожаатларнинг айримлари жойида ҳал этилди, қолганларига ҳуқуқий тушунтириш берилди ва ижроси назоратга олинди. Шунингдек, муассасаларда ўрнатилган Омбудсман қутилари кўздан кечирилиб, ундаги мурожаатлар олиниб, ижрога қаратилди.

5-сон колонияга ташриф давомида маҳкумларнинг қариндошлари билан суҳбат чоғида, узоқ муддатли учрашувга кириш учун бир неча кун навбат кутиш ҳоллари мавжудлиги билдирилди. Ушбу масала ўрганилиб, уни ҳал этиш бўйича колония маъмурияти билан тегишли чора-тадбирлар белгилаб олинди.

Мониторинг жараёнида маҳкумларнинг меҳнат шароитлари, иш ҳақи тўланиши, хавфсизлик ва санитария қоидаларига риоя қилиниши ҳам кўриб чиқилди. Шунингдек, маҳкумлар ўртасида “Заковат” интеллектуал ўйини ташкил этилди ва унда минтақавий вакил ҳайъат аъзоси сифатида иштирок этди.

Мониторинг якунларига кўра, Омбудсман таъсир чоралари шаклидаги ҳужжатлар тайёрланиб, тегишли ташкилотларга тақдим этилди.

Олий Мажлиснинг Инсон ҳуқуқлари бўйича вакили (омбудсман) Ахборот хизмати