Tibbiy ko‘rikka Xorazm viloyati Sog‘likni saqlash boshqarmasining malakali shifokorlaridan iborat ishchi guruh, jumladan, endokrinolog, kardiolog, travmatolog, nevropatolog, LOR, dermatolog, urolog, ginekolog, okulist shifokorlari jalb etildi. Shuningdek, mahkum va mahbuslar ultratovush tekshiruvi (UTT), EKG hamda rentgen uskunalari yordamida tibbiy ko‘rikdan o‘tkazildi.

Tibbiy tekshiruvlar natijasiga ko‘ra, 23 nafar shaxsga qandli diabet, 27 nafar shaxsga gipertoniya kasalligi, 11 nafar shaxsga yurakning ishimik kasalligi, 5 nafar shaxsga ginekologik, 15 nafar shaxsga nevrologik, 6 nafar shaxsga travmatologik, 18 nafar shaxsga dermatovenerologik va 7 nafar shaxsga ko‘z kasalliklari bilan bog‘liq tashxislar qo‘yildi.

Tibbiy ko‘rik natijalari bo‘yicha 1 nafar shaxsga qo‘shimcha tekshiruv tavsiya etildi, shuningdek, ambulator sharoitda davo muolajalarini olayotganlarga qo‘shimcha dori-darmonlar yozib berilgan bo‘lsa, 3 nafar shaxsga jarrohlik amaliyotini o‘tkazish tavsiyasi berildi.

Shu kuni mazkur tergov hibsxonasiga monitoring tashrifi ham amalga oshirilib, mahkum va mahbuslarning yashash joylari, yuvinish xonalari, oshxona, oziq-ovqat mahsulotlari saqlash va uzoq muddatli uchrashuv xonalari, fuqarolarni qabul qilish joyi hamda hududdagi boshqa sharoitlar o‘rganildi.

Shuningdek, hibsxonada saqlanayotgan shaxslar bilan o‘tkazilgan suhbat jarayonida mazkur muassasadagi sharoitlar bo‘yicha ular fikrlari o‘rganildi.

Oliy Majlisning Inson huquqlari bo‘yicha vakili (ombudsman) Axborot xizmati