Nogironligi bo‘lgan shaxslarni parlament saylovlarida deputatlikka nomzod sifatida qatnashish ko‘nikmalarini shakllantirish bo‘yicha seminar-treninglar tashkil etilmoqda

Joriy yil davomida O‘zbekiston Respublikasi Oliy Majlisning Inson huquqlari bo‘yicha vakili (ombudsman) va “Demokratiya va inson huquqlari” instituti hamkorligida AQSHning O‘zbekistondagi elchixonasi moliyaviy ko‘magida qator seminar-treninglar tashkil etildi. Ushbu tadbirlar nogironligi bo‘lgan shaxslarni parlament saylovlarida nomzod sifatida qatnashib, bu boradagi qonunchilikka oid bilimlarini oshirish orqali ularning siyosiy va huquqiy madaniyatini yuksaltirishga qaratilgani bilan ahamiyatlidir.

Shu kunga qadar, bu kabi seminar-treninglar Toshkent shahri, Jizzax, Sirdaryo, Buxoro, Samarqand viloyatlari hamda Qoraqalpog‘iston Respublikasida o‘tkazildi. Ushbu tadbirlarda 170 nafardan ortiq ishtirokchilar qamrab olindi.

Hozirda ushbu ishtirokchilarning ko‘pchiligi O‘zbekiston Respublikasi Oliy Majlisi Qonunchilik palatasi, Qoraqalpog‘iston Respublikasi Jo‘qorg‘i Kengesi va xalq deputatlari viloyat, tuman va shahar Kengashlari saylovida nomzod sifatida ro‘yxatga olingan.

Nogironligi bo‘lgan shaxslarni parlament saylovlarida deputatlikka nomzod sifatida faol qatnashish ko‘nikmalarini oshirish bo‘yicha navbatdagi seminar-trening Surxondaryo viloyatida o‘tkaziladi.

Oliy Majlisning Inson huquqlari bo‘yicha vakili (ombudsman) Axborot xizmati