Mahkumlar o‘rtasida “Zakovat” intellektual o‘yini o‘tkazildi

O‘zbekiston Respublikasi Prezidentining “Zakovat” intellektual o‘yinini aholi o‘rtasida ommaviy-maʼrifiy harakatga aylantirish va boshqa intellektual o‘yinlarni rivojlantirishga oid chora-tadbirlar to‘g‘risida”gi qarori hamda Ichki ishlar vazirligi huzuridagi Jazoni ijro etish departamenti tasdiqlagan “Yo‘l xaritasi”ga muvofiq yosh mahkumlarning aqliy salohiyatini oshirish va fikrini teran qilish maqsadida jazoni ijro etish muassasalarida “Zakovat” intellektual o‘yinlari o‘tkazilib kelinmoqda.

2024 yilning 17 may kuni Oliy Majlisning Inson huquqlari bo‘yicha vakili (Ombudsman)ning Sirdaryo viloyatidagi mintaqaviy vakili va 3-mintaqaviy muvofiqlashtirish markazi 8-son tergov hibsxonasi bilan hamkorlikda mazkur muassasadagi jazo muddatini o‘tayotgan shaxslar o‘rtasida “Zakovat” intellektual o‘yini tashkil etildi.

Mazkur tanlov 6 xil yo‘nalishdagi savollar, jumladan mantiqiy, geografik, adabiyot, tarixiy kashfiyotlar, rus tili va dunyoviy bilimlar bo‘yicha o‘tkazildi.

Qizg‘in muhokama va savol-javoblarga boy tarzda o‘tgan tanlov yakunida ishtirokchilar “Eng yaxshi jamoa” hamda jamoalar o‘rtasida “Eng faol ishtirokchilar” nominatsiyasi bo‘yicha taqdirlandilar.

Oliy Majlisning Inson huquqlari bo‘yicha vakili (ombudsman) Axborot xizmati