Муҳокама мобайнида таъкидланганидек, сўнгги йилларда мамлакатимизда инсон ҳуқуқ ва эркинликларини таъминлашда Омбудсман институтининг ўрни ва аҳамияти изчил ортиб бормоқда. Фуқаролардан келиб тушган мурожаатлар сони, кўриб чиқилган масалалар кўлами ва улар бўйича эришган натижалар шундан дарак бериб турибди. Бу эса Омбудсман институти аҳоли учун ҳақиқий ва таъсирчан ҳимоя механизмига айланиб борганини кўрсатмоқда.

Сенаторлар Омбудсман томонидан 2025 йилда инсон ҳуқуқлари ва эркинликларини таъминлашга қаратилган қатор ишлар бажарилганини таъкидлади. Жумладан, Омбудсман томонидан жисмоний ва юридик шахсларнинг бузилган ҳуқуқ ва манфаатларини ҳимоя қилиш ва тиклаш бўйича тизимли ишлар амалга оширилган.

Ўтган йилда Омбудсманга иқтисодий ҳуқуқ ва эркинликлар бўйича 7 584 та мурожаат келиб тушган. Уларнинг аксарият қисми Қашқадарё ва Сурхондарё вилоятлари, шунингдек, Тошкент шаҳрига тўғри келади.

Мурожаатлар асосида 2025 йилда ер участкалари давлат ва жамоат эҳтиёжи учун олиб қўйилиши муносабати билан компенсация тариқасида тўланиши лозим бўлган 3,9 млрд сўмдан ортиқ маблағни фуқароларнинг фойдасига ундиришга ёрдам кўрсатилди.

Шунингдек, ўтган йилда иш ҳақи ва меҳнат муносабатлари билан боғлиқ мурожаатлар юзасидан фуқароларга 2,3 млрд сўм миқдорида пул маблағлари ундирилди.

Муҳокама якунида Қўмитанинг тегишли қарори қабул қилинди.