Мониторинг доирасида 3-сон тергов ҳибсхонаси, Балиқчи ва Избоскан туманларидаги вақтинча сақлаш ҳибсхоналари, руҳий касалликлар ва наркология шифохоналари ҳамда маъмурий қамоққа олинган шахсларни қабул қилиш ва сақлаш махсус қабулхонасидаги шароитлар ўрганилди.

3-сон тергов ҳибсхонасига ўтказилган мониторингда маҳкум ва маҳбусларнинг ётоқ жойлари, ошхона, кутубхона, даволаш бўлими ва қисқа ва узоқ муддатли учрашув хоналари кўздан кечирилди. Шунингдек, маҳбус ва маҳкумлар билан жамоавий ҳамда якка тартибда суҳбатлар ўтказилди.

Шу куни Омбудсман ташаббуси билан вилоят Соғлиқни сақлаш бошқармаси ҳамкорлигида ушбу ҳибсхонада чуқурлаштирилган тиббий кўрик ташкил этилди. Унда 200 нафардан ортиқ шахслар иштирок этиб, мутахассис шифокорлар томонидан текширувдан ўтказилди.

Тиббий кўрик натижаларига кўра, аниқланган касалликлар диспансер назоратига олиниб, мутахассислар тавсияси асосида зарур тиббий муолажалар белгилаб берилди.

Вақтинча сақлаш ҳибсхоналарига ўтказилган мониторингларда эса аввалги ўрганишлар асосида киритилган Омбудсман тақдимномасида кўрсатилган камчиликларнинг бартараф этилиши ҳолатига алоҳида эътибор қаратилди. Уларда ҳибсхонада санитария-гигиена ва моддий-техник таъминотга оид жиддий камчиликлар, канализация тизими билан боғлиқ муаммолар борлиги аниқланган эди.

Мониторинг натижалари юзасидан тегишли вазирлик ва идораларга Омбудсманнинг таъсир чоралари шаклидаги ҳужжатлар киритилиши таъминланади.

Эслатиб ўтамиз, Омбудсман томонидан қийноқларни олдини олиш бўйича мониторинг ташрифлари якуни юзасидан тайёрланган таҳлилий маълумотлар, тегишли давлат органларибилан бир қаторда Олий Мажлис палаталарига ҳам тақдим этиб келинмоқда.

 Олий Мажлиснинг Инсон ҳуқуқлари бўйича вакили (омбудсман) Ахборот хизмати