Tashriflar davomida mazkur muassasalarda saqlanayotgan shaxslarning yashash, ovqatlanish, tibbiy xizmatdan foydalanish sharoitlari, advokatlar xonasi, kutubxona hamda hududlarning qish mavsumiga tayyorgarlik holati o‘rganildi.

Monitoring tashriflarida u yerda saqlanayotgan 150 nafardan ortiq shaxslar bilan jamoaviy suhbatlar o‘tkazildi. Shuningdek, Ombudsmanning mintaqaviy vakiliga murojaat qilish istagida bo‘lgan shaxslar bilan yakka tartibda suhbatlar o‘tkazilib, ularning murojaatlari qabul qilindi.

O‘rganish yakunlari bo‘yicha mutasaddi vazirlik va idoralarga tegishli Ombudsmanning tavsiyalari kiritiladi.

Ta’kidlash joizki, Ombudsmanning mintaqaviy vakillari tomonidan yopiq muassasalarga o‘tkazilgan avvalgi monitoring tashriflarida aniqlangan kamchiliklarni bartaraf etish masalalari doimiy ravishda Ombudsman nazoratida bo‘ladi.

Masalan, Norin tumanidagi mastlik holatida bo‘lgan shaxslarga tibbiy yordam ko‘rsatish punktida avvalgi monitoringda qator kamchiliklar aniqlangan edi. Ombudsmanga ma’lum qilinishicha, ushbu kamchiliklar bartaraf etilgan.

Oliy Majlisning Inson huquqlari bo‘yicha vakili (Ombudsman) Axborot xizmati