Sayt test rejimida ishlamoqda / Сайт тест режмида ишламоқда / The site is running in test mode / Сайт работает в тестовом режиме
TelegramTwitterphoneInstagramYouTubeFacebook
Иштихонда “Омбудсман мактаби”: фуқаролар мурожаатларида кўтарилган масалалар муҳокама қилинди
2026 йилнинг 20 ноябрь куни Олий Мажлиснинг Инсон ҳуқуқлари бўйича вакили (омбудсман) томонидан Самарқанд вилоятининг Иштихон туманида “Омбудсман мактаби” лойиҳаси доирасида аҳоли билан очиқ мулоқот ўтказилди. Унда мазкур туманнинг «Чиғатой», «Зартепа», «Тўпор», «Жўра Маҳмудов», «Муротобод», «Ўзбекистон», «Қўчқор Шамсиев», «Барлос», «Қора қўйли», «Мурод Жўраев» ва «Сафар хўжа» маҳаллаларида яшовчи 200 нафардан ортиқ фуқаролар иштирок этди.

“Омбудсман мактаби” тадбирлари ҳудудлардан келиб тушаётган мурожаатлар таҳлили асосида, фуқаролар томонидан кўп кўтарилаётган масалаларни жойида муҳокама қилиш ва уларга ҳуқуқий тушунтиришлар бериш мақсадида ташкил этилмоқда.

Таҳлиллар Самарқанд вилоятидан 2025 йил давомида 1 409 та мурожаат келиб тушган бўлса, 2026 йилнинг 9 ойи давомида уларнинг сони 1 217 тани ташкил этган. Иштихон туманидан ҳам 2025 йилда 70 та мурожаат келиб тушган бўлса, 2026 йилнинг 9 ойида бу кўрсаткич 56 тани ташкил этган.

Туман аҳолисидан келиб тушган мурожаатларнинг асосий қисми шахсий, иқтисодий, ижтимоий ҳамда хотин-қизлар ва болалар ҳуқуқларига оид масалаларни ташкил этган.

Мазкур мурожаатлар таҳлилидан келиб чиқиб, учрашув давомида жамиятда хотин-қизларга нисбатан зўравонликка муросасиз муносабатни шакллантиришда давлат органлари ва маҳалла ҳамкорлиги, эҳтиёжманд аҳоли қатламларига манзилли ижтимоий ёрдам ва хизматлар кўрсатиш, шунингдек, фуқароларнинг уй-жой ва ер участкаларига бўлган ҳуқуқларини қонунийлаштириш масалалари муҳокама қилинди.

Очиқ мулоқот шаклида ўтказилган тадбирда фуқаролар ўзларини қизиқтирган ҳуқуқий ва ижтимоий масалалар юзасидан саволлар бериб, таклиф ва мулоҳазаларини билдиришди. Кўтарилган масалаларни ваколатли идоралар билан ҳамкорликда ўрганиш ва ҳал этиш бўйича тегишли чоралар белгилаб олинди.

Олий Мажлиснинг Инсон ҳуқуқлари бўйича вакили (омбудсман) Ахборот хизмати