Мониторинг ташрифларида ушбу муассасаларда сақланаётган шахсларнинг ётоқ жойлари, ювиниш хоналари, ошхоналар, тиббиёт бўлимлари, озиқ-овқат маҳсулотлари ва дори-дармонларни сақлаш шароитлари, кутубхона, маданий дам олиш, телефон орқали мулоқот қилиш, учрашув хоналари, тинтув хоналари, сайилгоҳ, тергов ва адвокатлар хоналаридаги шарт-шароитлар, шунингдек, видеокузатув камераларининг ҳолати ўрганилди.

Мониторинглар давомида айрим муассасаларда илгари аниқланган камчиликлар бартараф этилгани маълум бўлди. Жумладан, Урганч шаҳридаги 11-сон тергов ҳибсхонасида шахслар учун мўлжалланган хоналар таъмирланиб, зарур жиҳозлар билан таъминланганлиги аниқланди.

Шунингдек, айрим муассасаларда моддий-техник жиҳозлаш ва хавфсизлик чораларини янада такомиллаштириш зарурати борлиги қайд этилди. Хусусан, Гурлан туманидаги ҳушёрхона зарур компьютер техникаси ва кондиционер билан таъминланмагани, шунингдек, пунктга кириш қисми олдида кузатув камераси ўрнатилмагани қайд этилди.

Мониторинг жараёнида “Омбудсман қутиси” орқали келиб тушган мурожаатлар кўриб чиқилди, муассасаларда сайёр қабуллар ўтказилиб, мурожаатлар қабул қилинди.

Олий Мажлиснинг Инсон ҳуқуқлари бўйича вакили (омбудсман) Ахборот хизмати