Мажлисда Омбудсман Ф.Эшматова маъруза қилди.
Маърузада қонунчилик таклифлари киритилишининг сабаблари, унинг ҳуқуқий асослари тўғрисида маълумотлар берилди.
Хусусан, Омбудсман ва унинг ҳузуридаги жамоатчилик гуруҳлари томонидан ўтказилган мониторинг ташрифлари ва келиб тушган мурожаатлар таҳлили асосида ишлаб чиқилган қонунчилик таклифида тергов ҳибсхоналарида сақланаётган шахслар учун амал қилаётган айрим тартиб-қоидаларнинг қайта кўриб чиқилиши, шахсларнинг кундалик эҳтиёжларини таъминлаш имкониятларининг яхшиланишига қаратилган нормалар назарда тутилганлиги таъкидлаб ўтилди.
Маърузада тергов ҳибсхоналарида ўтказилган мониторинг ташрифларининг натижасида ҳамда ушбу муассасаларда сақланаётган шахслардан келиб тушган мурожаатларда шахсларнинг дам олиш ва ишланмайдиган байрам кунларида ҳам қўшимча равишда кийим-бош ва пойабзал олишлари, шунингдек дам олиш ва ишланмайдиган байрам кунларида камида икки соат давом этадиган сайр этишга рухсат берилиши билан боғлиқ мурожаатларнинг кўпайганлиги таъкидлаб ўтилди.
Ишлаб чиқилган қонунчилик таклифларида тергов ҳибсхоналарида ушлаб турилган шахсларнинг дам олиш ва ишланмайдиган байрам кунларида камида икки соат давом этадиган сайр этиш ҳамда ҳар ойда озиқ-овқат маҳсулотлари ва энг зарур нарсаларни сотиб олиши учун белгиланган меҳнатга ҳақ тўлаш энг кам миқдорининг бир бараваригача бўлган миқдорда пул сарфлаши мумкинлигини назарда тутувчи нормалар билан тўлдириш таклифи билдирилди.
Қонунчилик таклифларини ишлаб чиқишда АҚШ, Швеция, Норвегия, Финландия, Германия, Канада ва бир қатор МДҲ давлатларининг амалиёти ўрганилганлиги, миллий қонунчиликни қабул қилинган халқаро мезонлар талабларига уйғунлаштирилиши зарурлиги айтиб ўтилди.
Қонунчилик таклифининг Қонунчилик палатасида кўриб чиқилиши Конституцияда белгиланган инсонпарварлик, инсоннинг шаъни, қадр-қиммати ва бошқа ҳуқуқларининг олий қадрият сифатида тан олинишининг ҳаётга самарали татбиқ этилишига, қамоққа олинган шахсларнинг тузалиш йўлига ўтишига, миллий қонунчиликни халқаро амалиётга янада уйғунлаштирилишига хизмат қилиши қайд этилди.
Мажлисда қонунчилик таклифи депутатлар томонидан маъқулланди ва тегишли қарор қабул қилинди.
Олий Мажлиснинг Инсон ҳуқуқлари бўйича вакили (омбудсман) Ахборот хизмати
