Ўзбекистон Республикаси Олий Мажлисининг Инсон ҳуқуқлари бўйича вакили (омбудсман) номига фуқаролар томонидан йўлланаётган мурожаатларнинг аксариятида, мурожаатчилар дастлабки тергов органларига тақдим қилинган ариза ва шикоятларга бир ойлик муддатда жавоб келмаётганлигидан норози бўлишмоқда. 

Маълумки, “Жисмоний ва юридик шахсларнинг мурожаатлари тўғрисида”ги Қонуннинг 28-моддасида ариза ёки шикоят масалани мазмунан ҳал этиши шарт бўлган давлат органига, ташкилотга ёки уларнинг мансабдор шахсига келиб тушган кундан эътиборан ўн беш кун ичида, қўшимча ўрганиш ва (ёки) текшириш, қўшимча ҳужжатларни сўраб олиш талаб этилганда эса, бир ойгача бўлган муддатда кўриб чиқилиши белгиланган.

Бироқ, мазкур Қонуннинг 1-моддасида эса қонуннинг амал қилиши - кўриб чиқиш тартиби маъмурий жавобгарлик тўғрисидаги, фуқаролик процессуал, жиноят-процессуал, жиноят-ижроия, иқтисодий процессуал қонунчилик ва бошқа қонун ҳужжатлари билан белгиланган мурожаатларга тадбиқ қилинмаслиги кўрсатилган. Шу муносабат билан, дастлабки тергов жараёнидаги муддатлар ЖПК 351-моддасида 3 ой этиб белгилангани, қўшимча ўрганиш талаб қилинганда эса 5 ой ва 7 ойгача узайтирилиши мумкин эканлиги белгиланган. Юқоридагилардан келиб чиққан ҳолда, фуқароларимиздан дастлабки тергов олиб борилиши юзасидан йўлланаётган мурожаатларга Жиноят процессуал кодексида белгиланган муддатларда жавоб хати талаб қилиниши мақсадга мувофиқ эканлиги маълум қилинади.