Monitoring tashrifida tergov hibsxonasidagi mahbuslarning yashash tarzi, ovqatlanish, mehnat qilish, tibbiy yordam olish sharoitlari va sanitariya-gigiyena talablariga rioya etish holati o‘rganildi. Bu haqda monitoringda qatnashgan Kun.uz muxbiri xabar bermoqda.
Dastlab, kuzatuvchilar muassasada mahbuslarning oila aʼzolari bilan qisqa va uzoq muddatli uchrashuv, telefon so‘zlashuv uchun mo‘ljallangan xonalarni ko‘zdan kechirdi.
Shuningdek, mahbuslarga ko‘rsatiladigan tibbiy yordam masalasi yuzasidan hibsxonaning ichki tibbiy bo‘linmasi shifokori dori-darmon, uskunalardan kamchilik va muammolar yo‘qligini, qoniqarli darajada sharoitlar borligini aytdi.
Lekin, shifokorning aytishicha, hibsxonada kadrlar masalasida muammo bor.
«Belgilangan 47 shtat o‘rindan 5 ta shifokor vakant o‘rnimiz mavjud. Oylik maoshimiz past bo‘lgani sababli, shifokorlar bu muassasada ishlashdan bosh tortishmoqda», – deydi bo‘linma shifokori.
U o‘tgan yili hibsxonada saqlanayotgan va koronavirusga chalingan mahbuslarni 1-tergov hibsxonasi shifokorlari davolagan bo‘lsa-da, ularga ustama pullari berilmaganini maʼlum qildi.
Tergov harakatlarini o‘tkazish va advokat bilan muloqot qilish uchun mo‘ljallangan xonalarni ko‘zdan kechirish jarayonida, bu toifadagi xonalar videokuzatuv vositalari bilan jihozlangani va advokatlar istalgan vaqtda advokatlik so‘rovnomasi bilan tergov jarayonlarida tasvirga olingan videomateriallarni talab qilib olishi mumkinligi aytildi.
Bu yerda erkak va ayollar alohida 4 kishilik xonalarda saqlanadi va ular bir kunda bir mahal sayr uchun hovliga olib chiqib turiladi.
Masʼullarning aytishicha, xohlovchilar bo‘lsa, o‘zlarining xonasida ibodat qilishlari mumkin.
Ayni vaqtda bu yerda 1900 dan ortiq mahbus bo‘lib, ularning soni doimiy ravishda o‘zgarib turadi. Yaʼni sud jarayonlaridan so‘ng mahbuslar doimiy koloniyalarga o‘tkazilishi yoki ozod qilinishi mumkin.
Kun.uz‘ga intervyu bergan mahbuslardan biri, bu yerda sharoitlar yaxshi ekanini, hibsxona xodimlari tomonidan hech qanday jismoniy va ruhiy tazyiqlar bo‘lmayotganini bildirdi. Uning aytishicha, tozalik va sanitariya masalalari xar bitta mahbusning o‘ziga bog‘liq, chunki tozalikni saqlash uchun maʼmuriyat tomonidan kerakli tozalash vositalari ajratiladi.
Tashrif davomida Ombudsman kotibiyati mudiri Saidbek Azimov bu muassasa jahon tajribasini inobatga olgan holda loyihalashtirilganini aytib o‘tdi.
«Ushbu muassasadagi fuqaroni xatti-harakati hali tergov yoki sud jarayonida bo‘lgani sababli uni jinoyatchi deb hisoblab bo‘lmaydi. Shuning uchun bu yerda har bitta tafsilotga alohida eʼtibor qaratilgan.
Fuqarolar ushbu muassasaga tushganda g‘amgin muhitdan stressga tushishining oldini olish uchun xonalarning ko‘rinishi yorqin ranglarda bo‘yalgan, binoning har bir burchagiga bir xil quyosh nuri tushishi uchun formasi yulduzcha shaklida qurilgan.
Bu muassasa birinchi, eksperiment tarzida foydalanishga topshirilgan obyekt hisoblanadi, keyinchalik shunday obyektlar bosqichma-bosqich boshqa hududlarda ham qurilishi kutilmoqda», – dedi u.
kun.uz
