Мурожаатда қайд этилишича, 2023 йил ноябрь ойида фуқаро А.О. бошқарувидаги “Дамас” русумли автомашина иштирокида йўл-транспорт ҳодисаси содир бўлган. Ҳодиса натижасида зарар кўрган BYD русумли автомашина "Gross sug‘urta kompaniyasi" АЖ томонидан суғурта қилинган бўлиб, ушбу компания жабрланувчига суғурта товонини тўлаган.

Шундан сўнг, "Gross sug‘urta" мазкур тўловни А.О.дан қайтариб олиш мақсадида фуқаролик ишлари бўйича Кармана туманлараро судига даъво аризаси киритган. Суд қарорига кўра, А.О.га етказилган зарар, давлат божи ва почта харажатларини тўлаш мажбурияти юклатилган.

Аслида эса, А.О.нинг "Дамас" автомашинаси ҳам "Euroasia Insurance" АЖ томонидан суғурта қилинган бўлиб, амалдаги "Мажбурий суғурта тўғрисида"ги Қонунга асосан, айнан шу компания мазкур мажбуриятни ўз зиммасига олиши керак эди. Бироқ, А.О.нинг расмий талабномасига қарамасдан, "Euroasia Insurance" белгиланган тўловни амалга оширмаган.

Фуқаро мурожаати Омбудсман назоратига олинди. Ҳолат батафсил ўрганилиб, суғурта ташкилотига тегишли таъсир чоралари киритилди. Натижада "Euroasia Insurance" АЖ фуқаро А.О.нинг суғурта мажбурияти бўйича тўловини амалга оширди ва фуқаронинг бузилган ҳуқуқи тикланди.

Олий Мажлиснинг Инсон ҳуқуқлари бўйича вакили (омбудсман) Ахборот хизмати