Маълум қилинганидек, ушбу ҳужжатнинг мақсади Олий Мажлиснинг Инсон ҳуқуқлари бўйича вакили (омбудсман) фаолиятини тартибга солишдан иборат бўлиб, ушбу ҳужжат 8 боб, 57 та моддадан иборат. Амалдаги қонун эса 22 моддадан иборат эди.

Қонун лойиҳаси билан Омбудсман фаолиятининг ҳуқуқий асослари, унинг асосий вазифалари, ҳуқуқлари, мажбуриятлари ва фаолиятининг кафолатлари каби нормалар Ўзбекистон Республикаси Конституциясига мос равишда  такомиллаштирилмоқда. Жумладан, Омбудсманнинг қонунчилик таклифларини қонунчилик ташаббуси тартибида Ўзбекистон Республикаси Олий Мажлисининг Қонунчилик палатасига киритиш ҳуқуқи белгиланмоқда.

Шунингдек, Вакилга Ўзбекистон Республикаси Президенти, Ўзбекистон Республикаси Олий Мажлиси палаталари ва Вазирлар Маҳкамасига инсон ҳуқуқлари, эркинликларини ва қонуний манфаатларини ҳимоя қилишнинг айрим йўналишлари бўйича ҳуқуқий, ташкилий, ижтимоий-иқтисодий ва бошқа чора-тадбирлар кўришга қаратилган махсус маърузалар тақдим қилиш ҳуқуқи ҳам берилмоқда.

Қонун лойиҳасига кўра, Омбудсман Ўзбекистон Республикаси томонидан инсон ҳуқуқлари ва эркинликларига риоя этиш ва уларни ҳимоя қилиш бўйича ратификация қилинган халқаро шартномалар мажбуриятларининг бажарилиши юзасидан муқобил маърузалар тайёрлаши ва тегишли халқаро ташкилотларга киритиши мумкин.

Фракция аъзолари қонун лойиҳасининг муҳимлигини, инсон ҳуқуқларини ҳимоя қилишда Омбудсманнинг ўрни алоҳида аҳамиятга эга эканини таъкидладилар. Қонун лойиҳасини янада такомиллаштириш юзасидан фикр-мулоҳазалар алмашиниб, депутатлар томонидан бир қатор таклифлар билдирилди.

Қонун лойиҳаси қизғин муҳокамалардан сўнг фракциялар аъзолари томонидан қўллаб-қувватланди.

Олий Мажлиснинг Инсон ҳуқуқлари бўйича вакили (омбудсман) Ахборот хизмати