Машғулотлар Олий Мажлиснинг Инсон ҳуқуқлари бўйича вакили (омбудсман)нинг Хоразм, Самарқанд, Сирдарё, Андижон ва Фарғона вилоятлари ҳамда Тошкент шаҳридаги минтақавий вакиллари томонидан ўтказилди.

Дарслар Хоразм вилояти Хонқа туманидаги 5- ва 27-, Самарқанд вилояти Тайлоқ туманидаги 14- ва 51-, Сирдарё вилояти Мирзаобод туманидаги 15-, Сирдарё туманидаги 9- ва Гулистон шаҳридаги 8-, Андижон вилояти Булоқбоши туманидаги 2-, Фарғона вилояти Учкўприк туманидаги 1-, 4-, 20- ва 37-, шунингдек, Тошкент шаҳридаги 154-сонли умумий ўрта таълим мактабларида ташкил этилди.

“Омбудсман соати” анъанавий маъруза шаклида эмас, балки видеодарслар, интерактив ўйинлар, қизиқарли савол-жавоблар ҳамда фото ва видеоматериаллар асосида ўтказилди.

Машғулотлар давомида ўқувчилар инсон ҳуқуқ ва эркинликлари, уларнинг қонуний кафолатлари ва ҳимоя механизмлари билан таништирилди. Шунингдек, кибержиноятчиликдан ҳимояланиш, интернет ва ижтимоий тармоқлардан хавфсиз фойдаланиш, ҳуқуқбузарликларнинг олдини олиш ҳамда турли салбий таъсирларга тушиб қолмаслик бўйича ҳаётий мисоллар асосида тушунтиришлар берилди.

Олий Мажлиснинг Инсон ҳуқуқлари бўйичавакили

(омбудсман) Ахборот хизмати