Ташриф доирасида маҳбусларга яратилган шароитлар ўрганилди, уларнинг тиббий варақалари кўздан кечирилиб, дори-дармон билан таъминланиш ҳолати ва тиббий хизмат сифати ҳам таҳлил қилинди.

Шу билан бирга, ижтимоий тармоқларда тарқалган, маҳбуслардан бири билан учрашувга рухсат берилмагани ҳақидаги хабар юзасидан ҳам ўрганиш ишлари олиб борилди. Аниқланишича, Сирдарё вилоятидан келтирилган маҳбусларда қизамиқ касаллиги аниқланган ва ҳибсхона тиббиёт бўлими бошлиғининг қарорига асосан бир камерада сақланган 3 нафар шахс белгиланган тартибда карантинга олинган.

Ўзбекистон Республикасининг “Аҳолининг санитария-эпидемиологик осойишталиги тўғрисида”ги Қонунига мувофиқ, юқумли касалликлар тарқалишининг олдини олиш мақсадида карантин даврида ушбу шахсларни суд ва тергов органларига олиб чиқиш, адвокат ва яқинлари билан учрашувлар вақтинча чекланади.

Мониторинг жараёнида адвокатлар билан суҳбатлар ўтказилди. Уларнинг билдиришича, ҳозирда касаллик белгилари мавжуд бўлмаган шахслар билан учрашувларга ҳеч қандай тўсиқлар йўқ ва улар мижозлари билан эркин мулоқот қилиш имкониятига эга.

Шунингдек, ҳибсхона ҳудудидаги “Омбудсман қути”лари кўздан кечирилиб, мурожаат ўрганиш учун қабул қилинди.

Олий Мажлиснинг Инсон ҳуқуқлари бўйича вакили (омбудсман) Ахборот хизмати