Mazkur holat bo‘yicha, Oliy Majlisning Inson huquqlari bo‘yicha vakili (ombudsman) Toshkent viloyati hokimiyatiga murojaat qilib, murojaatchiga uy-joy sharoitlarini yaxshilash uchun moddiy va ijtimoiy yordam ko‘rsatishni so‘ragan edi.

Ombudsmanga maʼlum qilinishicha, hozirda murojaatchining chala qurilgan uyi homiylar tomonidan taʼmirlandi, issiqlik va gaz bilan taʼminlangan.

Shuningdek, 2-guruh nogironligi bo‘lgan ota tibbiy ko‘rikdan o‘tkazilib, 1-guruh nogironi sifatida ro‘yxatga olingan. 

Eslatib o‘tamiz, Vazirlar Mahkamasining 2015 yil 10 avgustdagi 237-son qarori bilan tasdiqlangan “Keksalar va nogironligi bo‘lgan shaxslarga ijtimoiy xizmatlar va ijtimoiy yordam ko‘rsatish, shuningdek ijtimoiy xizmatlarning yakka tartibdagi dasturini shakllantirish va amalga oshirish tartibi to‘g‘risida”gi Nizomning 6-bandiga muvofiq, yolg‘iz yashaydigan hamda yolg‘iz keksalar va nogironligi bo‘lgan shaxslarga uyida parvarish qilish bo‘yicha ijtimoiy xizmatlar tibbiy-ijtimoiy xizmatlarni rivojlantirish bo‘limlari tomonidan ko‘rsatiladi hamda ular maishiy xizmat ko‘rsatishni, shu jumladan oziq-ovqat mahsulotlarini, zarur sanoat tovarlarini va dori-darmonlarni sotib olish va uyiga yetkazib berishni, ovqatlar tayyorlashda va uyni yig‘ishtirish-tozalash, gigiyena ishlarida ko‘maklashishni o‘z ichiga oladi.

Oliy Majlisning Inson huquqlari bo‘yicha vakili (ombudsman) Axborot xizmati