Ногиронлиги бўлган шахсларнинг ҳуқуқий хабардорлигини оширишга қаратилган тадбирда 50 нафарга яқин эшитиш ва гапириш имконияти чекланган фуқаролар иштирок этишди. Очиқ мулоқот давомида мамлакатимизда ногиронлиги бўлган шахслар ҳуқуқларини ҳимоя қилиш бўйича амалга оширилган ислоҳотлар, уларнинг  ижтимоий ҳимояси, таълим олиши, ишлаши борасида белгиланган имтиёзлар ҳақида маълумотлар берилди.

Таъкидланишича, Ўзбекистон Республикаси "Ногиронлиги бўлган шахсларнинг ҳуқуқлари тўғрисида"ги Қонуннинг 6-моддасида ногиронлик белгисига кўра камситилишга йўл қўймаслик тамойили акс эттирилган. Унга кўра, ногиронлиги бўлган шахсларга нисбатан ҳар қандай ажратиб қўйиш, истисно этиш, четлатиш, чеклаш ёки афзал кўриш ҳолатлари, шунингдек ногиронлиги бўлган шахсларнинг объектлар ва хизматлардан фойдаланиши учун шарт-шароитлар яратишни рад этиш тақиқланади.

Учрашувда иштирок этаётган имконияти чекланган шахслар ҳозирда тикувчилик, зардўзлик, касаначилик ва бошқа йўналишларда фаолият олиб бораётганликларини ҳамда ижтимоий объектларни ногиронлиги бўлган шахслар учун мослаштириш борасидаги ишларга алоҳида эътибор қаратилаётганидан мамнун эканликларини билдиришди.

Ўзаро мулоқот давомида Омбудсманнинг Сирдарёдаги минтақавий вакили Шуҳрат Алимов улар мурожаатларини ўрганди. Учрашувда 10 дан ортиқ мурожаатлар юзасидан ҳуқуқий тушунтиришлар берилди ва 3 та мурожаат назоратга олинди. Мурожаатларда иш ҳақини ундириш, ижтимоий ёрдам олиш, жумладан, уй-жойни таъмирлаш, соғлиғини тиклашда амалий ёрдам бериш масалалари кўтарилди.

 Олий Мажлиснинг Инсон ҳуқуқлари бўйича вакили (омбудсман) Ахборот хизмати