Sayt test rejimida ishlamoqda / Сайт тест режмида ишламоқда / The site is running in test mode / Сайт работает в тестовом режиме
TelegramTwitterphoneInstagramYouTubeFacebook
Yopiq muassasalarga monitoring o‘tkazish bo‘yicha xalqaro amaliyot o‘rganildi
Avval xabar berganimizdek, Oliy Majlisning Inson huquqlari bo‘yicha vakili (ombudsman) Feruza Eshmatova xizmat tashrifi bilan Polshaning Varshava shahrida bo‘lib turibdi. U YEXHT mintaqasi inson huquqlari bo‘yicha milliy institutlari rahbarlarining oliy darajadagi uchrashuvlarida ishtirok etgan edi. Ombudsman ushbu tadbirlar  doirasida  7-9 sentyabr kunlari tashkil etilgan inson huquqlari bo‘yicha milliy institutlar, qiynoqlarni oldini olish bo‘yicha milliy preventiv mexanizmlar guruhlari va fuqarolik jamiyati vakillari uchun tashkil etilgan mintaqaviy treningda ham ishtirok etdi.

“Jinsiy va genderga asoslangan zo‘ravonlik muammosini qamoqda saqlash monitoringiga integratsiya qilish” mavzusiga bag‘ishlangan treningda Markaziy Osiyo, Janubiy Kavkaz, Janubi-Sharqiy Yevropa, Markaziy va Sharqiy Yevropa mamlakatlaridan nazorat mexanizmlarining 50 ga yaqin vakillari qatnashishdi.

Mazkur mintaqaviy trening jinsiy va genderga asoslangan zo‘ravonlik muammosini qamoqda saqlash monitoringiga integratsiya qilishda nazorat mexanizmlarining salohiyatini kuchaytirishga qaratilgan.

Unda ishtirokchilarga zo‘ravonlikni aks etishi mumkin bo‘lgan xatti-harakatlar turlari, ularning monitoringi bilan bog‘liq muayyan xavf va muammolarni aniqlash hamda bartaraf etish bo‘yicha xalqaro amaliyot haqida maʼlumot berildi.

Trening davomida qator davlatlar Ombudsmanlari jazoni ijro etish muassasalariga monitoring tashkil etish bo‘yicha o‘z tajribalari bilan bo‘lishishdi.

Oliy Majlisning Inson huquqlari bo‘yicha vakili (ombudsman) bu boradagi o‘z tajribasiga to‘xtalar ekan, ushbu monitoring tashriflari jamoatchilik va OAV vakillari ishtirokida o‘tkazilishiga urg‘u berdi.

Erkin muloqot va guruhlarga bo‘linib ishlash usullarini o‘zida jamlagan mazkur treningda zo‘ravonlik holatlarini aniqlashdagi nazorat mexanizmlari va belgilangan ko‘rsatmalar yuzasidan fikr almashildi.

Oliy Majlisning Inson huquqlari bo‘yicha vakili (ombudsman) Axborot xizmati